Samtang ang gobyerno nagtutok sa modernisasyon sa Ninoy Aquino International Airport (NAIA), ang Bureau of Immigration (BI) hingpit nga nagsuporta sa mga reporma nga gitumong sa paghimo sa mga serbisyo sa airport nga world-class — dili lamang sa mga pasahero, kondili alang usab sa dedikadong mga personahe sa imigrasyon.
Kalabot niini, pormal nga nipirma og kasabotan ang BI sa Department of Transportation (DOTr) ug Manila International Airport Authority (MIAA).
Kini nga kasabotan nagtutok sa tulo ka nag-unang tumong: pagdugang sa manpower, pagpalapad sa deployment sa e-gates alang sa mas paspas nga pagproseso, ug pagsiguro sa mas makiangayong benepisyo para sa mga opisyal sa BI.
Matod ni BI Commissioner Joel Anthony Viado, kining maong lakang direktang tubag sa mando ni Presidente Ferdinand Marcos Jr. nga himuong episyente, moderno, ug globally competitive ang mga serbisyo sa mga dagkong tugpahanan sa nasod.
Lakip sa dinalian nga mga reporma mao ang pagdugang sa mga opisyal sa Immigration sa mga nahibal-an nga choke points, ilabi na sa peak hours, aron masiguro ang paspas nga dagan sa mga pasahero.
Sa samang higayon, ang paggamit sa e-gates – teknolohiya nga nagpadali sa proseso sa imigrasyon pinaagi sa automated verification – mokusog.
