Hugot nga nagpahimangno ang Bureau of Fire Protection (BFP) General Santos sa mga motorista nga dili iparada, ihunong, o biyaan ang ilang mga sakyanan atubangan o duol sa mga fire hydrant.
Matud pa nga pag-obstruct sa fire hydrant mahimong makapahinay sa operasyon sa mga bombero, ilabina sa panahon sa sunog diin importante ang matag segundo aron dali makakuha og tubig ang mga responder.
Sumala sa Republic Act No. 9514, o Fire Code of the Philippines of 2008, lakip sa mga gidili ang pag-obstruct o pagbabag sa mga fire hydrant ug uban pang pasilidad nga gikinahanglan sa pagresponde sa sunog.
Ang mga molapas sa maong probisyon mahimong mahatagan og multa nga ₱12,500 hangtod ₱25,000, subay sa nag-apply nga mga probisyon sa Fire Code ug sa Revised Implementing Rules and Regulations (RIRR) niini.
Busa, gihangyo sa General Santos City Fire Station ang publiko nga dili harangan o dili magpark sa mga lugar diin nahimutang ang fire hydrant.
Kinahanglan nga kanunay nga libre, klaro ug dali ma-access ang mga fire hydrant aron magamit dayon sa mga bombero kung adunay emerhensiya.
Gipahibalo usab sa General Santos City Fire Station nga makigkoordinar kini sa Traffic Enforcement Unit (TEU) ug sa Land Transportation Office (LTO), kung gikinahanglan, aron matubag ang mga paglapas ug mapalig-on ang pagsunod sa kasamtangang mga balaod ug regulasyon.
