Aktibo karon ang Bureau of Fire Protection (BFP) Gensan sa ilang preparasyon alang sa umaabot nga Fire Prevention Month karong Marso. Sumala ni FO1 Vickie Pineda, Public Information Officer sa BFP Gensan, naka-red alert na ang yunit sukad sa pagsugod sa bulan tungod kini ang panahon nga gilauman nga adunay pinaka-init nga klima, hinungdan nga delikado ang posibilidad sa sunog.
Gidugang pa sa opisyal nga gipalig-on sa BFP ang ilang mga aktibidad kabahin sa fire prevention, labi na ang pag-edukar sa katawhan sa husto nga paagi sa paglikay sa sunog panahon sa tag-init
Ang kick-off ceremony sa Fire Prevention Month magsugod sa usa ka motorcade sa sayo sa kabuntagon, nga molibot sa pipila ka bahin sa syudad aron masayran sa katawhan ang mga programa sa BFP ug mapalig-on ang kahibalo sa kaluwasan batok sa sunog.
Gipakita sa BFP Gensan nga seryoso ang ilang preparasyon ug determinadong mapugngan ang bisan unsang insidente sa sunog, samtang nag-awhag sa publiko sa kooperasyon ug pag-amping sa ilang palibot.
