Mipanaw na ang beteranong abogado nga si Jose C. Sison sa edad nga 88, sumala sa gipahibalo sa iyang anak nga si kanhi Quezon City Vice Mayor Jose “Jopet” Sison ning adlaw nga Huwebes.
Sa usa ka Facebook post, gipahibalo ni Jopet Sison nga malinawon nga mipanaw ang iyang amahan buntag sa Hulyo 23, 2026.
“This morning, July 23, 2026, our Papa Ping peacefully joined our Creator. We are comforted that he lived a full life as a lawyer, a husband to Josie, a father to his six children, and a grandfather to his sixteen grandchildren. Please keep him in your prayers and remember him with love and fond memories,” matud ni Jopet Sison.
Wala na ipahibalo sa pamilya ang hinungdan sa iyang pagkamatay.
Magsugod ang haya Biyernes sa hapon, Hulyo 24, sa Ascension Chapel sa Immaculate Conception Cathedral sa Cubao, Quezon City.
Gikatakdang ilubong si Sison sa Martes, Hulyo 28, sa Heavens Gate 1 Memorial Park sa Antipolo City.
Gipaabot pa sa pamilya ang pag-anunsyo sa eksaktong oras sa paglubong.
Natawo niadtong Abril 7, 1938, si Jose C. Sison giila isip usa sa mga respetadong abogado sa nasud.
Sulod sa pipila ka dekada nga iyang pagserbisyo sa natad sa abogasya, nakahatag siya og dakong kontribusyon sa propesyon sa balaod ug nahimong ehemplo sa daghang mga abogado ug mga estudyante sa pagtuon sa balaod.
