Kumpirmadong patay si Silimee, ang Miss Tourism Myanmar 2018, human napalgan ang iyang lawas sa kagun-oban sa Sky Villa condominium sa Mandalay, tungod sa kusog nga linog nga miigo sa Myanmar niadtong Marso 28, 2025.
Sa opisyal nga pahayag sa Miss Tourism Myanmar, si Silimee, kinsa nagrepresentar sa Myanmar sa Miss Tourism World 2018, namatay human ma-trap sa usa ka nahugno nga building sa tunga-tunga sa linog. Ang iyang lawas nakit-an sa mga rescue team kaniadtong Abril 2.
Ang linog nga nitay-og sa sentrong bahin sa nasud niabot sa 7.7 magnitude ug nabatyagan usab sa mga silingang nasud sama sa Thailand, Vietnam, ug bahin sa China.
Ang Punong Ministro sa Thailand nga si Paetongtarn Shinawatra nagpatawag dayon og usa ka emerhensya nga miting bahin sa insidente.
Ang Sky Villa usa ka 12-andana nga bilding nga gitukod kaniadtong 2017, nga usa sa labing grabe nga nadaot. Nailhan kini nga adunay pinakadako nga rooftop bar ug moderno nga gym sa Mandalay, ug gigamit sa pagpasigarbo sa gituohang “earthquake-resistant” nga disenyo.
Sa pinakaulahing report niini, nisaka ngadto sa 3,085 ang ihap sa nangamatay sa linog.
