Makadawat ug P1-million nga prize money ang mapilian nga Binibining Pilipinas queens ning tuiga nga pinakadako nga prize money nga ihatag sa sulod sa 60 ka tuig nga kasaysayan sa maong prestihiyoso nga national pageant.
Sama sa kompetisyon sa nakalabay nga tuig, duha ka winners ang iproklama ug makaangkon ug titulo nga Bb. Pilipinas International ug Bb. Pilipinas Globe.
Gawas nga pareho nga makaangkon ug P1-million prize, pareho usab sila nga magsuksok ug bag-o nga korona nga gidesinyo sa renowned jewelry ug accessories maker nga si Manny Halasan.
Gianunsyo usab sa organisasyon nga mag-donate ang Bb. Pilipinas Charities Inc. (BPCI) ug P1-million sa napili niini nga charity institution ning tuiga nga mao ang World Vision Philippines.
Ipahigayon ang Grand Coronation Night sa Smart Araneta Coliseum sa Hulyo 7 kun asa ang magsilbi nga hosts mao silang Miss Universe 2018 Catriona Gray, Miss International 2016 Kylie Verzosa, Miss Grand International 2016 first runner-up Nicole Cordoves, ug Miss Universe Philippines 2014 MJ Lastimosa.
Mukabat sa 40 ka mga kandidata ang mag-indigay sa maong edition sa pageant.
Kahibaluan nga lakip sa na-produce sa Binibining Pilipinas mao ang upat ka Miss Universe winners sa Pilipinas nga silang Gloria Diaz, Margie Moran, Pia Wurtzbach, ug Gray.
Aduna usab lima ka Miss International winners—Aurora Pijuan, Melanie, Marquez, Precious Lara Quigaman, Bea Rose Santiago, ug si Verzosa.
Gikan usab sa Bb. Pilipinas silang Miss Intercontinental winners Karen Gallman ug Cinderella Faye Obeñita ingon man silang Maricar Balagtas, Ann Colis ug Maureen Montagne nga parehong gikoronahan sa Miss Globe pageant system.
