Miuyon si BB Gandanghari sa sugyot nga usbon ang Juvenile Justice and Welfare Act aron ipaubos ang edad sa criminal responsibility gikan sa 15 anyos ngadto sa 10 anyos.
Sa usa ka Facebook Live ni Robin Padilla, giingon ni BB nga nasabtan niya ang tumong sa maong sugyot ug dili kini aron dayon silotan o prisohon ang mga bata, kundili aron adunay kahadlok o “deterrent” nga makapahunong kanila sa paghimo og krimen.
Matod ni BB, ang punto sa maong sugyot mao ang pagpahinumdom sa mga kabatan-onan nga adunay kaakibat nga responsibilidad ang ilang mga lihok.
Nabuhi pag-usab ang debate bahin sa pagpaubos sa edad sa criminal responsibility human sa insidente sa usa ka eskwelahan sa Tacloban City diin tulo ka estudyante ang namatay.
Si Senator Robin Padilla usa sa mga nagduso nga usisahon pag-usab ang maong balaod. Apan gisupak kini sa Akbayan Party-list nga miingon nga dili angay gamiton ang maong trahedya aron ipatuman ang usa ka polisiya nga ilang giingong mahimong makadaot sa mga bata.
Gawas sa pag-usab sa Juvenile Justice Law, gisuportahan usab ni Padilla ang pagbutang og limitasyon sa paggamit sa social media sa mga menor de edad.
