Nanawagan ang progresibong party-list group nga Bayan Muna sa publiko nga iprotesta ang pagkadiskaril sa impeachment complaint ug awhagon ang Senado nga magtigom karong Hunyo 21.
Sa usa ka pamahayag, giklaro ni Bayan Muna chairman Neri Colmenares nga bisan og ni-adjourn na ang Senado isip legislative body, mahimo gihapon kining mag-convene isip impeachment court base sa patakaran sa Senado.
Niinsistir usab si Colmenares nga kinahanglang mag-convene ang Senado karong Hunyo 21 aron makadawat sa tubag sa respondent ug sugdan na ang impeachment trial human ang Senado nga naporma nga impeachment court niadtong Hunyo 11 mimando sa Office of the Vice President sa pagsumite sa tubag niini sulod sa 10 ka adlaw.
Giawhag usab ni Colmenares ang House of Representatives nga tubagon dayon ang kamandoan sa impeachment court, nga miinsister nga ang impeachment complaint wala makalapas sa balaod ug andam silang mopasaka og kaso ug moatubang sa impeachment court karong Hunyo 21.
Kay kon dili, matod niya, dunay mga Senador nga moingon nga gidiskaril sa Kamara ang pagdungog sa wala pagtuman sa mando sa korte.
Siya usab miingon nga ang Kamara kinahanglan nga ibalik ang bola sa Senado pinaagi sa paghagit sa mga Senador nga magtigum isip usa ka impeachment court sa Hunyo 21.
Sa kataposan, gitataw ni Colmenares nga dili lang ang mga lungsoranon sa Metro Manila kon dili lakip na ang mga probinsiya sa tibuok nasod ang angayang mohimo og mga protesta aron dasigon ang Senado nga magtigom karong Hunyo 21.
Kini aron masayran kon asa gigasto ni Vice President Sara Duterte ang P612 million nga pundo sa publiko ug kon anaa ba gayod ang giingong nakadawat sa kuwarta, sama ni Mary Grace Piattos, nga matod niya gigamit unta alang sa libreng tambal, edukasyon og uban pang social services.
