GENERAL SANTOS CITY – Mas nahimong klaro ang baruganan sa administrasyong Duterte sa isyu sa West Philippine Sea.
Kini ang gibutyag sa Bombo Radyo ni Political Science Professor Richard Pernia sa Mindanao State University (MSU-GenSan).
Kini human gibutyag ni Pangulong Rodrigo Duterte sa iyang ikatulong SONA kagahapon nga dili isurender sa Pilipinas ang katungod sa giilogang teritoryo.
Matud pa kang Prof. Pernia, nalipay siya nga madunggan mismo gikan sa baba sa pangulo ang pagprotekta sa foreign policy sa nasud.
Sumala kang Pernia, husto ang pahayag sa Pangulo nga bisag maayo ang relasyon sa Pilipinas ug China apan dili mahimong ikompromiso ang teritoryo sa West Philippine Sea.
Sa iyang pahayag, ang direksyon sa foreign policy sa nasud ang dili na pareha sa una nga murag gaguyod-guyod sa ubang polisiya sa laing nasud.
Sa isyu sa korapsyon, gitan-aw ni Pernia nga usa ka ambisyoso nga pangandoy sa pangulo nga matapna ang korapsyon.
Apan wala nagpasabot nga dili mulihok ang gobyerno inay angayang magtinabangay ang tanan para masumpo kini og dili ang Pangulo ang magsagubang lang niini.
Sa pahayag ni Pernia, may kalahian gikan sa una og ikaduha ang SONA kagahapon sa Pangulo tungod wala nay daghang adlib.
