Magpahigayon og hugot ug lawom nga imbestigasyon ang Konseho sa Barangay Lagao, General Santos City, kalabot sa fetus nga napalgan sa mga residente sa Molave Street, Rosario Village ning dakbayan.
Sa pamahayag ni Kapitan Jaime Tatad, iyang gihatagan og direktiba ang mga Purok Chairman aron ilocate ug masuta kinsa sa ilang lugar ang mga buntis nga bag-o lang nanganak.
Gipasabot sa kapitan nga ang mga buntis nga kalit lang nga nihiyos ang tiyan apan walay nakita nga bata nga dala, maoy ilakip sa listahan sa mga imbestigahan.
Gisugo usab ni Kapitan Tatad ang mga Barangay Health Worker sa Lagao nga susihon ang rekord sa prenatal check-up sa ilang barangay aron dali matumbok kinsa ang posibleng inahan sa maong fetus.
Apan giklaro sa kapitan nga dili usab malimod ang posibilidad nga gikan sa laing lugar ang inahan ug gilabay lang sa ilang barangay ang fetus. Kung masakpan ang responsable sa paglabay niini, gisiguro ni Kapitan Tatad nga ipatubag kini sa balaod tungod sa grabeng sala nga nabuhat niini.
Ang maong insidente nagpukaw og kabalaka ug kuryosidad sa mga residente, ug gilauman nga pinaagi sa imbestigasyon sa barangay masayran ang tinuod nga hinungdan ug matagaan hustisya ang biktima.
