Napasa na sa prosecution panel sa impeachment trial ni Vice President Sara Duterte ang mga kopya sa bank records ug tax records sa bise presidente, sa iyang bana nga si Atty. Manases “Mans” Carpio, ug sa ilang mga kompanya.
Matud ni Bicol Saro Representative Terry Ridon, susihon pag-ayo sa prosecution team ang maong mga dokumento isip kabahin sa ilang pagpangandam sa pagpresentar sa ebidensya kalabot sa alegasyon sa dili mapaklaro nga kabtangan batok kang Duterte.
Gilauman nga ipresentar sa prosecution ang maong mga ebidensya atubangan sa Senate Impeachment Court sa tunga-tunga hangtod sa ulahing bahin sa Setyembre.
Una nang gimandoan sa Senate Impeachment Court ang mga bangko, ang Bureau of Internal Revenue, ug ang Anti-Money Laundering Council nga isumite ang mga rekord kalabot kang Duterte ug Carpio.
Sumala sa prosecution, ilang susihon ang bank accounts ug tax documents aron matino kung adunay ebidensya nga mosuporta sa alegasyon sa unexplained wealth, nga nalambigit sa giingong kapakyasan sa hustong pagdeklarar sa mga kabtangan ug net worth.
