GENERAL SANTOS CITY – Nangalap og dugang impormasyon ang Malungon Police Station aron matultulan ang gitaguan sa usa ka bana human nga gipusil patay ang iyang asawa sa Sitio Cawayan, Brgy. Lower Mainit, Malungon Sarangani Province.
Giila ang biktima nga si Faith Tiwado, 56 anyos, minyo, residente sa maong lugar.
Sumala pa ni Police Lieutenant Colonel Edgar Yago, chief of Police sa Malungon Police Station ang suspek ang giila nga si Edi Tiwado, kanhing barangay kapitan sa Lower Mainit.
Wala na magpakita sa lugar ang nasampit human sa panghitabo apan andam na ang kasong parricide nga ipasaka batuk sa nasampit.
Sumala pa ni Yago nga sa imbestigasyon, nasayran sa kapulisan nga adunay problema sa pamilya ang magtiayon kon diin buot sa suspek nga makuha niini ang bahin sa yuta nga mas dako pa sa mga anak ug asawa apan dili musugot ang pamilya.
Gani nakaabot na sa korte ang kaso apan wala gasipot ang mister ug gihimo ang naasoyng nga krimen.
Nasayran nga nakahiagom ang biktima ug daghang samad pinusilan sa lawas nga hinungdan sa kamatayon.
Nakuha sa crime scene ang mga slugs sa .45 calibre sa armas ug 9mm pistol nga gituohan nga maoy gigamit sa krimen.
