GENERAL SANTOS CITY – Walay gibilin nga mga gamit ang wala mailhing mga kawatan human nga giransak ang balay matud pa sa founder sa investment scheme sa Capareda St. Barangay Lagao ning dakbayan.
Sa nakalap nga report sa Bombo Radyo GenSan sa Lagao Police Station, pasado alas 6:00 sa gabie gisulod ang balay ni Mr. Jun Sanchez nga nagpadagan matud pa sa NMC investment scheme.
Matud sa report, tanang mga mahinongdanong gamit lakip ang koral sa balay ang gikuha sa mga suspek.
Pagtuo sa mga residente sa lugar nga ang mga nabiktima sa maong investment scheme ang nagpaluyo sa pagpangransak sa balay.
Kahinumduman nga daghang investors sa NMC ang nagreklamo sa National Bureau of Investigation (NBI) human nga wala gituman sa founder niini ang gipasalig nga 400% nga tubo gikan sa gi-invest nga salapi.
Gibutyag sa reliable informant sa Bombo Radyo nga duha ka bulan na matud pa nga wala makit-an nga nagpuyo si Sanchez sa iyang balay human nga mibuto ang isyu kalabotan sa NMC kung asa gituohang misibat og nagtago na kini aron makalikay sa migukod kaniya nga mga investors.
