GENERAL SANTOS CITY – Mukapin sa P100,000.00 ang gibanabanaang danyos sa pagkaugdaw sa usa ka balay sa Brgy. Labangal ning syudad.
Kini ang pagbana-bana sa Bureau of fire Protection GenSan human nga girespondihan ang sunog alas dos sayo sa buntag, kagahapong adlawa.
Migawas sa imbestigasyon nga namatikdan ang kalayo sa caretaker nga si Melvin Caballes human nga nakadungog ug lagubo sa usa ka kuwarto sa balay.
Hinungdan nga gipukaw ang iyang mag-inahan og ang usa pa ka okupante sa balay. Tungod sa pagdali-dali nga makagawas sa balay, walay nasalbar nga gamit si Caballes.
Una niini, namatikdan sa nasampit nga nawala ang ilang TV ug tangke sa LPG hinungdan nga duda siya nga una ang sunog, gikawatan sila sa wala mailhing tawo.
Magpahigayon pa ang BFP og lalom nga imbestigasyon kung konektado ang sunog og pagpangawat apan dili pa nila kini makumpirma sa karon.
Nasayran nga nakontrola ang sunog alas 2:40 sa kaadlawon human nga gitabangan sa fire volunteer og BFP sa pagpasirit ug tubig ang naugdaw nga balay.
