Adamson University ROTC (file photo)
GENERAL SANTOS CITY – Andam ang DepEd 12 nga musunod ug ipatuman kung unsa man ang nakalatid sa balaod o mamahimong mandato ngadto kanila may kalabotan sa sugyot balaudnon nga ibalik ang ROTC kon Reserve Officers’ Training Corps.
Kahibaluan nga giaprubahan na sa Kamara sa ikatulong pagbasa ang Mandatory ROTC.
Sumala pa ni Anton Maganto ang tigpamaba sa Dep-Ed 12 nga gahulat ang DepEd sa mamahimong guidelines gikan sa Central office may kalabotan sa isyu sa ROTC nga pagkakaron padayon ang deliberasyon sa mga magbabalaud nga posible nga may mga mausab sa mga probisyon.
Sa pahayag pa niini, suportado sa DepEd ang programa nga magpalambo sa kapasidad og decision-making sa estudyante.
Kalabot sa isyu sa hazing nga gikabalak-an nga basin mahitabo atol sa ROTC, gipaklaro ni Maganto nga dili lamang ang tulunghaan ang may tulubagon apan lakip ang estudyante nga may responsibilidad nga sutaon ang aktibidad nga gisudlan.
Nakalatid sa House Bill 8961 nga makaangkon og mandatory ROTC program alang sa mga magtutungha nga enrolled sa Grades 11 ug 12 sa mga publib og private schools isip requisite sa ilang graduation.
