GENERAL SANTOS CITY – Nagapaabot lang ang lokal nga panggamhanan sa dakbayan kung unsa nga bakuna kontra sa COVID 19 ang ipadala sa GenSan.
Sa gipaabot nga impormasyon ni City-IATF information officer Jed Reston, ginakonsidera matod pa sa national government nga ang bakuna nga ginama sa kompaniyang Pfizer ang pwedeng magamit sa vaccination program batok sa corona virus disease.
Una niini, base sa pamahayag mismo ni vaccine czar Sec. Carlito Galvez nga dako matod pa ang puruhan nga magahinan ang siyudad sa maong bakuna gikan sa maong United States drugmaker.
Gibutyag ni Reston nga nakig-alayon na ang syudad sa Department of Health alang sa mga ‘requirements’ sa pagpalit og bakuna kung asa ang mamahimong prayoridad nga mahatagan mao ang mga vulnerable sectors susama sa senior citizens og frontliners.
Gani anaa sa P200 million gigahin nga pondo alang sa vaccination program nga magsugod sa mga sunod bulan.
Nagdesisyon ang syudad nga mupalit og COVID-19 vaccine aron masiguro ang kaluwasan og panglawas sa anaa sa 650,000 nga residente.
