Nagpabilin nga baho ang mga nangadunot nga debris sa Devighat, Nepal, bisan usa na ka bulan ang milabay sukad nga naigo kini sa makadaot nga pagbaha.
Padayon ang pagkalot sa baga nga lapok nga mitabon sa mga balay, negosyo ug mga importanteng kalsada.
Tungod sa padayon nga paglihok sa mga debris ug lapok, misamot usab ang baho sa tibuok palibot.
Sumala sa mga residenteng naluwas, ang pag-ubos sa makamatay nga baha maoy sinugdanan sa ilang sunod nga mga kalisdanan.
Bisan pa og daghan ang tabang nga miabot sa unang mga adlaw sa kalamidad, ilang gireklamo nga hinay-hinay nang mikunhod ang relief goods ug suporta nga ilang nadawat.
Gipahayag usab sa Finance Minister sa Nepal nga gikinahanglan sa nasod ang gibanabanang $4 bilyon ngadto sa $5 bilyon aron hingpit nga mabalik sa maayong kahimtang ang mga naguba nga imprastraktura ug komunidad.
Samtang, sa eksklusibong pakighinabi sa Star FM Bacolod kang Hope Joyce Degayo Sunwar, usa ka Pinay nga kasamtangang anaa sa Nepal, iyang gipaambit ang bayanihan sa mga kababayan nga Pilipino sa maong nasod.
Matod niya, nagtambayayong ang mga OFW ug mga Pilipino didto sa pagpangolekta og pinansyal nga tabang alang sa usa ka Pinay nga hingpit nga nawad-an og balay ug mga kabtangan tungod sa kusog nga pagbaha.
