Nagresulta sa baha ug landslide ang Bagyong Narra sa amihanang Vietnam ug habagatang bahin sa Guangxi sa China tungod sa kusog nga pag-ulan.
Sa China, mokabat sa 54,000 ka residente ang gipabalhin ngadto sa mas luwas nga mga lugar, lakip ang kapin 8,000 nga gidala sa mga emergency shelter.
Sa Vietnam, usa ang namatay ug kapin 4,300 ka panimalay ang naapektuhan ug gipapahawa tungod sa pagbaha ug landslide.
Nakadawat og tali sa 236 ug 300 milimetro nga ulan sulod sa 24 oras ang mga probinsya sa Lang Son ug Cao Bang, nga misangpot sa grabeng pagbaha ug pagguho sa yuta.
Naapektuhan usab ang Quang Ninh, diin nahimutang ang UNESCO World Heritage Site nga Ha Long Bay, human malubog sa tubig ang pipila ka bahin sa siyudad ug maapektuhan ang turismo, pangisda ug transportasyon.
Kapin 10,000 ka ektarya nga humay ug uban pang pananom ang nadaot sa Vietnam, samtang naputol usab ang suplay sa kuryente ngadto sa hapit 55,000 ka panimalay.
