Gideklara ang state of calamity sa Baguio City human sa nagpadayon nga epekto sa krisis sa lana nga gipahinabo sa gubat sa Middle East.
Kini human giaprobahan sa konseho sa siyudad ang Resolution No. 257 series of 2026, nga nahiuyon sa miaging deklarasyon sa national state of emergency ni Presidente Ferdinand Marcos Jr.
Gipirmahan ni Baguio Mayor Benjamin Magalong ang maong resolusyon aron pormal nga ipatuman ang state of calamity sa siyudad.
Uban sa deklarasyon, magamit na sa lokal nga gobyerno ang pundo niini alang sa disaster risk reduction ug management aron matubag ang epekto sa kakulangon sa suplay sa enerhiya.
Gitugotan usab ang gobyerno sa siyudad nga gamiton ang gikinahanglan nga mga kahinguhaan, ipatuman ang mga regulasyon, ug makig-alayon sa mga ahensya sa nasud alang sa mas epektibo nga pagpatuman sa programa.
Sumala sa report, ang pagsaka sa presyo sa lana adunay dakong epekto sa siyudad, lakip na ang pagkunhod sa gidaghanon sa mga turista hangtod sa 50% sa miaging Semana Santa.
Agig tubag, gipatuman sa lokal nga gobyerno ang usa ka free ride ug emergency mobility program.
