GENERAL SANTOS CITY – Ginapasigarbo karon sa Soccsksargen Region ang natala nga bag-ong record sa Long Jump (Elementary girls) sa nagpadayon nga Palarong Pambansa 2019 sa Davao City.
Sa pakighinabi sa Bombo Radyo GenSan kang Jojo Duhilag, Physical Education Sports Supervisor sa DepEd 12, gikumpirma niini nga nalampasan ni Hazel Domocum nga taga South Cotabato ang 5.07 meters record sa Long Jump ni Alyssa Marie Andrade gikan sa Region 6-Western Visayas (The Blue Barons) nga natala kaniadtong 2010 Palarong Pambansa sa Tarlac City.
Kini human magtala ug bag-ong record nga 5.08 meters sa iyang dula kaniadtong Martes ug nasakmit ang bulawan nga medalya.
Samtang nasakmit ni Mariku Jobelle Caayohan gikan sa Region 4-A (Calabarzon the Heroes) ang silver medal sa iyang rekord nga 4.82 meters ug bronze medalist naman si Chrislyn Riel Penales gikan sa Region 10 (NorthMin Stars) sa iyang record nga 4.80 meters.
Samtang gikumpirma usab ni Duhilag nga adunay nay 17 gold medals ang Soccsksargen base sa partial and unofficial medal tally sa Palarong Pambansa 2019.
