GENSAN-Gipahibalo sa Civil Aviation Authority of the Philippines (CAAP) nga magsugod na ang bag-ong ‘parking fee rates’ sa tanang tugpahanan nga gidumala sa CAAP, lakip na ang General Santos City Airport sugod Hunyo 15, 2025.
Matud pa ni Joel Gavina, manager sa CAAP-GenSan nga base kini sa CAAP Memorandum Circular No. 019–2025, ilawom sa Republic Act 9497, nga nagtugot sa CAAP sa pag-regulate sa bayad sa paggamit sa mga pasilidad sa airport.
Base sa bag-ong parking rates, para sa unang duha ka oras, ang mga bus magbayad og P100, sa mga kotse-P50, og sa motorsiklo -P25 ang bayran nga parking fee.
Samtang ang sunod nga oras gikan sa pagtapos sa duha ka oras, ang bayran nga parking fee sa bus ang P50, sa mga kotse-P25, motorsiklo-P15. Ang tanan nga bayad apil na sa Value Added Tax (VAT).
Gipasalig ni Gavina nga adunay i-isyu nga resibo sa gibayrang parking fee.
