GENERAL SANTOS CITY – Balhug sa San Isidro Police Station ang usa bag-ong laya gikan sa GenSan City Jail human malambigit sa pagpanunggab.
Giila ang suspek nga si Kempee Banayo, 27-anyos, residente sa Johnny Ang, Brgy City Heights ning siyudad, ug nabilanggo kaniadto tungod sa kasong carnapping, apan nabasura hinungdan nga nahimong gawasnon.
Samtang iyang gidunggab nailhan nga si Larry Monato, 34-anyos, residente sa Brgy San Isidro ning dakbayan.
Sa imbestigasyon, samtang gailis ang biktima sulod sa iyang lawak, kalit na lamang kining gidunggab sa suspek gamit ang kutsilyo, sa wala masayri nga rason.
Nakaangkon ang biktima ug samad-dinunggaban sa liog, nga milapos sa likod, apan nagdumili na nga magpa-admit sa ospital, tungod wala matud pay pangbayad.
Kahibaluan nga misulay pag sibat ang suspek, apan nasikop pinaagi sa mga tanod.
Gihikay na ang mga dokumeto alang sa pagpasang-at ug kaso batok sa nagisgutang bag-ong laya, nga posibleng mabalik sa city jail gumikan sa nahimong krimen.
