GENERAL SANTOS CITY – Patay ang usa bag-ong laya human gipusil sa riding in tandem, pipila ka minuto lang human nakagawas sa bilangguan.
Giila ang biktima nga si Michael Soria Sr. 50-anyos, residente sa Prk. Dagohoy, Brgy Dadiangas North ning siyudad.
Gikabutyag nga upat ka tuig nga nabilanggo ang nasampit tungod sa kasong pagpangawat, ug paglapas sa RA 9165 kon Comprehensive Dangerous Drugs Act of 2002.
Nahitabo ang insidente pasado alas dos sa hapon, bag-uhay lamang human siya nakaabot sa ilang pinuy-anan. sa pakighinabi sa Bombo Radyo sa bayaw sa bikitima nga maoy ulahi niyang nakaistorya, duha ka lalaki nga naka-bonnet ug naka-maskara nga sakay sa motorsiklo ang mga suspek.
Igo ang biktima sa ulo nga maoy hinungdan sa iyang hinanaling kamatayon. Upat matud pa ka buto sa pusil ang nadunggan sa lugar.
Tulo ka basyo ug may slug sa wala pa matino nga pusil ang narekober sa crime scene. Padayon pa ang gihimong imbestigasyon sa kapulisan kalabot sa insidente.
Gatuo ang pipila sa kabanay sa biktima nga nasayod kini nga ginasundan siya gikan sa General Santos City Jail.
