GENERAL SANTOS CITY – Laing biktima na usab ang gipusil-patay dinhi sa siyudad, nga nahitabo sa Prk 15, Brgy Lagao, kung asa ang biktima giilang si Raymond Rapista Alias Paw-Paw, 32-anyos, mekaniko, residente sa Prk 5 sa nasampit gihapon nga barangay.
Base sa report, ang suspek duha ka tawo nga sakay sa XRM motorcycle nga walay plaka.
Matud sa usa ka witness nga tindera sa tindahan sa motorparts sa nasampit nga lugar nga una ang pagpamusil, nangutana pa kaniya ang usa sa mga suspek, kung asa makapalit ug ligid, dungan sa pagbunlot ug pusil, dayon kalit nga gipusil ang biktima trabahante sa maong establisyimento.
Paspas matud pang misibat ang mga suspek ug gisubay ang dalan paingon sa J. Catolico Avenue. Samtang ang biktima ang nadala pa sa ospital, apan gideklarang dead on arrival, gumikan sa naangkon nga usa ka samad-pinusilan sa ulo.
Sa pakighinabi sa Bombo Radyo, gibutyag ni Police Chief Inspector Peter Pinalgan, hepe sa Lagao Police Station, gikabutyag nga sa pagkakaron, gipaningkamutan nila nga makakuha ug kopya sa CCTV footage sa lugar, aron makatabang sa ginapahigayon nila nga imbestigasyon.
Ginasuta usab nila karon ang background sa biktima, aron matumbok ang posibleng motibo sa krimen, ug mga responsable niini.
