GENERAL SANTOS CITY – Nagkaguliyang ang mga tawo sa Silway, San Juan, Brgy Dadiangas West, human sa natigayong pagpamusil-patay kagabii sa ilang lugar.
Dead on the spot ang gihinganlan ug Danilo Dante alyas Intsik, 42-amyos, human gipusil sa riding in tandem.
Matud ni Brgy Kag. Acharon nga base sa iyang nakalap nga impormasyon, si Dante ang gikabutyag nga bag-ong laya ug tulo ka semana pa lamang ang nakalabay human nakagawas gikan sa Lanton City Jail gumikan sa kasong pagpangawat, ug kasamtangang gapuyo sa lugar.
Natigayon ang insidente pasado alas-7:00 Huwebes sa gabii, samtang gahigda matud pa sa duyan ang biktima, samtang ang iyang misis nga si Tata ang naa sa duol.
Matud sa asawa sa biktima, kalit may mihunong nga duha ka motorsiklo nga adunay tig-duha ka tawo nga sakay.
Gituuhang nagsilbing lookout ang mga nagsakay sa usa ka motorsiklo, samtang ang gunman ang backride sa ikaduhang motorsiklo.
Gikabutyag nga makaupat ka higayon nga gipusil sa gunman ang biktima, nga nakaangkon ug samad-pinusilan sa ulo ug liog, nga maoy hinungdan sa iyang hinanaling kamatayon.
Tulo ka mga basyo sa bala sa caliber 45 pistol ang nakaplagan sa crime scene.
Giimbestigahan na sa kapulisan ang ilhnanan sa mga suspek, ug ang motibo sa pagpamusil.
Gikabutyag nga blangko ang pamilya sa biktima sa posibleng hinungdan o motibo sa pagpamusil.
