Mag-abli sa bag-ong direktang linya sa komunikasyon o hotline tali sa mga buhatan sa pangulo sa China ug Pilipinas ang bag-o lang gipirmahan nga kasabutan.
Pinaagi sa direct hotline, ang nahisgutang mga hingtungdan nga opisyal mahimong makatawag sa ilang counterpart sa higayon nga adunay lain pang insidente sa giilogang katubigan nga sakop sa West Philippine Sea aron malikayan ang bag-ong komprontasyon.
Base sa kopya sa kasabotan, naglatid kini og daghang mga agianan sa komunikasyon tali sa Pilipinas ug China, partikular sa pagsulbad sa mga isyu sa kadagatan pinaagi sa mga representante nga itudlo sa mga presidente sa duha ka nasud.
Kung asa ang Department of Foreign Affairs ug ang Ministry of Foreign Affairs sa China makagamit usab sa maong hotline lakip na ang foreign minister ug vice foreign minister level o pinaagi sa ilang gitudlo nga mga representante.
Sumala sa kasabutan, aduna usab plano nga maghimo ug bag-ong communication channel tali sa mga Coast guard sa China ug Pilipinas kung mahuman na ang memorandum of understanding tali sa duha ka mga nasud.
Ang mga opisyal sa China ug Pilipinas karon nagtrabaho sa paghimo og mga guidelines aron ipatuman ang mekanismo sa komunikasyon sa dagat.
