Nakaplagan ang usa ka bag-ong himugso nga batang babaye nga buhi human nga gibilin sa likod sa usa ka balay sa Purok African Daisy-A, Baguio Proper, Baguio District, Davao City.
Sumala pa sa taho sa Davao City Police Office (DCPO), nakadawat ang Baguio Police Station (PS11) og report gikan sa usa ka concern citizen kabahin sa usa ka bag-ong himugso nga bata nga nakit-an sa nahisgutang dapit.
Nasayran nga nakaplagan sa usa ka Barangay Kagawad ang bata nga gi-abandona sa likod sa ilahang panimalay.
Gilayon nga gidala kini sa Isaac Robillo Hospital sa Calinan, diin kini anaa na karon sa “Under Observation Status”.
Ning panahuna nagpadayon pa ang gihimong imbistigasyon sa kapulisan aron nga mailhan ang kinsa mang responsableng inahan nga miabandona sa maong bata.
Gihangyo karon sa otoridad ang mga residente sa maong lugar nga kung adunay mga kasayuran sa maong panghitabo og mopaambit og impormasyon kabahin sa panghitabo.
