GENERAL SANTOS CITY – Gikatakdang ipatawag sunod semana sa Sangguniang Panglungsod si Police Senior Supt. Raul Supiter.
Kini ang gibutyag sa Bombo Radyo ni City Councilor Franklin Gacal Jr., aron matud pa maghatag sa iyang report ug update ang city PNP director, kalabot sa sitwasyon sa seguridad ug kalinaw sa siyudad.
Kini hilabi na nga daw sa adlaw-adlaw na lang nga may pagpamusil-patay nga natala sa siyudad, butang nga gikaalarma na sa mga opisyal sa lokal nga panggamhanan, hilabi na sa mga residente.
Matud ni Atty Gacal, makonsiderang insulto sa kapulisan ang maong sitwasyon karon sa siyudad, hilabi na nga daghan sa mga natala nga pagpamusil-patay sa nakalabay’ng mga adlaw, ang nahitabo duol lang sa mga presinto sa kapulisan.
Hinungdan nga hatagan matud pa nila ug kahigayunan ang labaw sa kapulisan sa siyudad nga magpaklaro, ug ipadayag ang mga planong aksyon sa kapulisan alang sa maong problema.
Dungan niini, gihingusgan ni Kag. Gacal nga kon ugaling tinuod man nga drug-related ang mga nasampit nga insidente, dili kini maayo gumikan bisan ang mga kriminal ang kinahanglan nga may sundon gihapon nga rule of law ug hatagan ug hustisya, ug dili angayang patyon.
Kalabot niini, nanggawas ang taho nga matud pa magpahigayon ug paglahugay sa mga chief of police sa pipila ka mga presinto sa siyudad, kung asa lakip niini ang mga police station kung asa may taas nga ihap sa pagpamusil-patay nga natala.
