GENERAL SANTOS CITY – Mitagana ang Department of Trade and Industry (DTI) ug PHP40 million alang sa pagpabarug sa permanente nga buhatan sa lugar nga kanhi giokopa sa Gensan flowers association.
Mismong si DTI Secretary Ramon Lopez maoy nanguna sa groundbreaking pagahapon alang sa five-story building nga ipatukod sa 600-square meter property nga gihatag sa LGU Gensan nga makita sa kanto Roxas Avenue ug Matalam Street sa Barangay Dadiangas East.
Gibutyag ni Sec Lopez nga ginaduso sa DTI ang mga proyekto alang sa kalambuan sa paghatud sa mga serbsiyo sa mga kliyente sa syudad ug sa mga silingan nga probinsya .
Una nga gibutyag ni DTI 12 Director Dorecita Delima nga gihatag sa syudad ang naasoy nga lugar kaniadtong 2001 ug paglabay sa tulo ka tuig misumite kini ug plano sa buhatan sa Mayor alang sa construction sa maong buhatan apan wala kini madayon.
Ang lima ka andana nga gambalay ang maglangkub sa conference room, negosyo center, exhibit room nga adunay moderno nga amenities.
Kung ikumpara mas dako ang naasoy nga buhatan sa regional Office didto sa Koronadal City nga aduna lamang P32M nga budget ug upat ka andana nga gambalay nga giablihan kagahapong adlawa. .
