GENERAL SANTOS CITY – Planong gamiton sa Philippine Drugs Enforcement Agency kon PDEA ang Barangay Anti-Drug Abuse Council (BADAC) sa ilang kampanya batok sa iligal nga droga.
Kini hilabi na nga gitahas ni Pangulong Rodrigo Duterte sa PDEA alang sa kampanya sa gobyerno batok sa iligal nga droga, samtang nagpahigayon ug internal cleansing ang PNP.
Ug gani, gidugang sa ilang trabaho ang drug clearing ug street-level pushing.
Matud ni PDEA-12 Regional Director Gil Castro, magsilbing mata ug dalunggan ang BADAC sa ilang matag barangay, alang sa mga target drug personalities nga anaa sa listahan sa PDEA.
Angayan usab matud pang dili pasagdan ang mga high value targets ug high impact targets alang sa mga ipahigayon nga operasyon.
Nasayran nga dinhi sa Rehiyon 12, kapin 70 lamang ang mga personahe sa ahensya, kung asa pangbahinon sila ug hatagan ug tagsa ka designated area partikular na sa matag probinsya sa tibuok rehiyon, dayon tabangan sila sa BADAC hilabi na sa pagpangalap ug impormasyon ug pagmonitor sa mga target persons, ingon man sa pag-aresto sa mga suspek.
Kahibaluan nga katambayayong sa PDEA ang kasundaluhan, kung asa tactical support lamang ang himuon atul sa mga operasyon nga ilusad sama sa pagpatuman ug search warrant o kaha buy-bust.
