GENERAL SANTOS CITY– Naangin lang ang sikad driver nga apil nga gipusil kagahapon sa buntag sa usa ka water refilling station sa Cabel St. Brgy Lagao ning siyudad.
Kini ang migawas sa inisyal nga imbestigasyon sa Lagao Police Station, kung asa gibutyag sa ilang hepe nga si Police Chief Inspector Peter Pinalgan, nga igo lamang nagkabo ug tubig ang nahisgutang biktima, nga giilang si Jimmy Cailan, taga-Balite, Lagao.
Matud pa nga base sa ilang mga nakahinabi nga nakasaksi sa insidente, dili magkaila silang Cailan ug ang babaye nga biktima nga si Faith Irish Dela Torre, nga gikabutyag nga maoy target sa suspek.
Kahibaluan nga nakabsan na usab sa iyang kinabuhi kagahapon sa hapon ang nahisgutang sikad driver, samtang gitambalan sa ospital.
Una niini, base sa imbestigasyon, migawas si Dela Torre gikan sa compound sa Hall of Justice gumikan sa nadawat nga tawag sa cellphone, human mitambong sa court hearing sa iyang kaso may kalabutan sa iligal nga droga.
Human makatabok sa kalsada, atubangan sa water refilling station, kalit kining gipusil sa nag-inusarang suspek, ug gisunod ug pusil si Cailan.
Nadala pa sa tambalanan si Dela Torre apan gideklarang dead on arrival.
