Usa ka babaye sa Ohio, U.S.A. nasurprisa sa pagkadiskobre nga ang karaang painting nga iyang gipalit sa usa ka thrift store sa kantidad nga $2.99 (mga P170) kay orihinal nga obra sa usa ka sikat nga artista ug gibaligya sa subasta sa kantidad nga $2,875 .
Si Marissa Alcorn, usa ka residente sa Dayton, kauban sa iyang pamanhonon sa dihang miadto sila sa usa ka tindahan sa Goodwill pagkahuman sa panihapon.
Samtang nagsuroy-suroy sa second hand shop, nabantayan niya ang usa ka karaang frame nga bag-o lang gikuha sa usa ka empleyado.
Matud kang Alcorn, dili niya gusto ang painting ug iyaha pa kining gitawag nga “ugly.” Apan tungod sa barato nga presyo, nakahukom siya nga paliton kini.
Samtang gibutang niya ang painting sa sakyanan, namatikdan niya ang usa ka gamay nga label nga gitaod sa ubos sa frame nga adunay titulo sa painting ug ang ngalan sa artist niini .
Pag-abot niya sa balay, nangita siya sa internet ug nasurprisa sa pagkahibalo nga ang dibuho maoy sa sikat nga American impressionist nga si Johann Berthelsen.
Sa sinugdan naghunahuna siya nga peke ang artwork, apan human miapil sa online nga grupo sa mga art appraiser, nadani siya nga i-appraise kini sa usa ka auction house sa Cincinnati.
Gidala niya kini sa Caza Sikes, diin gikumpirma sa mga eksperto nga ang iyang gikuptan mao gyud ang trabaho ni Berthelsen.
Ang painting nga gitawag og “Chapel, St. Patrick’s Church” gisubasta ug gibaligya sa kantidad nga $2,875 o naa sa P200,000 .
Matod ni Alcorn, iyang gamiton ang kuwarta alang sa umaabot niyang kasal.
