Usa ka 34-anyos nga babayeng atleta sa Australia ang nakabutang og bag-ong Guinness World Record human nakabuhat og 7,079 ka pull-ups sulod sa 24 oras, halos doble sa miaging rekord.
Sumala ni Olivia Vinson, ang ideya sa paghimo og world record sa mga pull-up sa sinugdan gikataw-an sa iyang bana, nga nagsilbi usab nga iyang coach.
Ang kanhing rekord, nga gihuptan sa Polish nga atleta nga si Paula Gorlo niadtong 2021, maoy 4,081 ka pull-up.
Human sa pagtuon sa mga numero, naghunahuna si Vinson nga mahimo niyang mabuntog kini, mao nga nagsugod siya sa pagpraktis.
Tulo na ka buwan nga nangandam niini si Vinson, apan sa unang pagsulay, nasamdan ang wala nga bukton, hinungdan nga nahunong ang pagsulay sa rekord pagkahuman sa 12 ka oras.
Kinahanglan siyang mopahuway og duha ka buwan sa dili pa mobalik sa pagbansay.
Sa ikaduhang pagsuway, nasinati niya ang grabeng kakapoy ug pagkalipong sa ika-19 nga oras sa pagbansaybansay, apan nilahutay gihapon siya.
Sa kinatibuk-an, si Vinson nakarekord og aberids nga lima ka pull-up kada minuto sulod sa 24-oras nga panahon.
Malampuson niyang nabutang ang bag-ong rekord ug giila sa Guinness World Records.
