Gipahibalo ni Australian Prime Minister Anthony Albanese nga ilhon sa Australia ang estado sa Palestine sa umaabot nga sesyon sa United Nations (UN) General Assembly sa Septiyembre 2025.
Sumala kay Albanese, ang desisyon gihimo human makuha sa Australia ang mga pasalig gikan sa Palestinian Authority, lakip ang demilitarization, pagpahigayon sa eleksyon ug padayon nga pag-ila sa Israel sa rehiyon.
Ang pahayag gihimo pagkahuman sa mga pakigpulong sa mga lider gikan sa UK, France, New Zealand, ug Japan.
Hugtanon usab nga gisupak sa Israel ang maong lakang, nga nag-ingon nga gigantihan niini ang mga terorista, labi na samtang nagpadayon ang opensiba niini batok sa Hamas sa Gaza, diin kapin sa 61,000 ka mga tao ang gitaho nga namatay sukad 2023, sumala sa Hamas-run health ministry.
Sa laing bahin, ang Palestinian Authority miingon nga ang pag-ila sa mga nasud maoy pamatuod sa nagkadako nga suporta sa katungod sa mga Palestinian sa kaugalingong paghukom.
Dugang pa, gipasalig ni Albanese nga dili kini maghatag ug papel sa Hamas sa bisan unsang dugang nga interbensyon sa Palestine.
Samtang, ang Estados Unidos nagpabilin nga dili kini ilhon ang estado sa Palestine sa pagkakaron, tungod sa kakulang sa usa ka epektibo nga gobyerno.
Gisaway ni Israeli Prime Minister Benjamin Netanyahu ang Australia ug mga nasod sa Europa tungod sa ilang lakang, nga iyang gitawag nga “shameful.”
Sa pagkakaron, 147 ka nasod sa 193 ka membro sa UN ang miila sa estado sa Palestine, nga adunay status nga “permanent observer state” sa organisasyon.
