GENERAL SANTOS CITY – Asphyxia o kawad-on sa hangin ang gilantaw nga hinungdan sa kamatayon sa 16-anyos nga estudyante nga si Barbie Inocencio nga taga Banga, South Cotabato.
Kini base sa migawas nga resulta sa crime laboratory subay sa inisyal nga imbestigasyon sa mga otoridad sa pagkamatay sa dalagita niadtong Desyembre 4 asa nakit-an kining nakasulod sa sako.
Dugang pagbutyag ni Police Lt. Col. Lino Capellan, tigpamaba sa Police Regional Office 12 nga gawas sa kawad-on sa hangin, posible usab daw nga gihilabtan ang biktima bag-o namatay.
Kini human may nakit-an matud pang laceration sa pribadong parte sa lawas sa biktima apan isumite pa ang sample nga nakuha sa dalagita alang sa dugang eksaminasyon ug sa sunod semana, gilaumang mogawas usab ang resulta niini.
