Natala ang mga sunog sa kalasangan sa mga bakilid sa Kanlaon Volcano human sa kasarangang pagbuto nga nahitabo mga alas 6:07 sa gabii. Domingo, matod sa Philippine Institute of Volcanology and Seismology (Phivolcs).
Tungod sa pagbuto, 54 ka barangay sa 10 ka lokal nga kagamhanan sa Negros Occidental ang nakasinati og ashfall ug baho sa sulfur, lakip ang Binalbagan, La Castellana, Moises Padilla, Hinigaran, Isabela, San Carlos, Himamaylan, Kabankalan, Pontevedra ug Ilog.
Matod ni La Castellana Mayor Añejo Nicor, halos 60% sa ilang lungsod lakip na ang town proper ang naapektuhan sa ashfall.
Gikataho usab ang Ashfall sa Canlaon City sa Negros Oriental.
Isip pag-amping, gisuspinde ang mga klase sa tanang lebel sa Himamaylan City, Moises Padilla, La Castellana ug Binalbagan niadtong Lunes, Marso 16, 2026.
Sumala sa Phivolcs, ang pagbuto nagbuga og 5-kilometros nga taas nga abo nga gipalid sa hangin paingon sa habagatan-sidlakan ug amihanan-sidlakan.
Kini ang ikatulong pagbuto sa Bulkan Kanlaon karong tuiga, human sa miaging mga kalihokan niadtong Pebrero 19 ug Pebrero 26. Nagbuga usab kini og dugang abo mga alas 10:31 sa gabii niadtong Domingo.
Ang status sa bulkan nagpabilin sa Alert Level 2 ug ang pagsulod sa 4-kilometros nga Permanent Danger Zone (PDZ) gidili gihapon.
Samtang, si Canlaon City Mayor Jose “Batchuk” Cardenas nanawagan sa mga residente nga magpabiling kalmado apan mag-alerto. Miingon siya nga ang mga rescue vehicle ug emergency response team sa siyudad andam na.
Gitambagan usab ang mga residente nga magsul-ob og face mask o tabunan ang ilang ilong ug baba og basa nga panapton aron mapanalipdan ang ilang kaugalingon gikan sa abo.
Sa Moises Padilla, temporaryong gihunong ang mga rehearsal sa street dance sa Barangay 4 human nagpasidaan si Mayor Ella Garcia-Yulo bahin sa mga risgo sa panglawas sa mga tawo nga dala sa abo, labi na sa respiratory system.
