GENERAL SANTO CITY – Desidido si Geanel Bomis Maglunob, 30 anyos nga tricycle driver, taga Prk 14, Brgy. Tinagacan nga magpasaka og kaso human naaktuhang magkauban ang iyang misis ug ang bayaw niini sulod sa lawak.
Balhog sa Lagao Police Station ang misis ni Geanel nga si Ledelyn Maglunob, 31 anyos, house helper ug ang bayaw niini nga si Glenn Mupal, 35 anyos ug taga Prk 2, Brgy Ligaya.
Matud pa ni Geanel, sa dugay nilang nag-ipon, aminado kini nga adunay mga problema nga niabot , apan wala damha niini nga tuig 2019, aduna na kini madunggan gikan sa mga silingan ug higala nga kanunay magkauban ang iyang misis ug bayaw apan wala niini gituohan ang chismis nga dunay relasyon ang duha gumikan mas gusto niya nga sya mismo ang makadakop sa mga nasampit.
Sumala niini, nagtuo siya nga nag trabaho ang misis gumikan stay in sa Dona Soledad Labangal.
Aron siya mismo ang makadakop, miadto siya sa balay sa iyang bayaw og didto naabtan niya ang asawa nga naghigda.
Dihang nibutho ang iyang bayaw, gilimod pa sa mga nahisgutan ang ilang relasyon.
Didto niya napamatud-an nga may relasyon ang duha dihang gigakos sa bayaw niya ang misis niini dihang gihulbot niya ang habol.
