Dili lalim ang ‘long distance relationship’, nga gitan-aw sa pipila nga usa sa mga rason nganong magkabulag.
Apan ang maong set-up sa relasyon ang napangitaan og solusyon sa asawa nga sama kaniya kinahanglan mobiyahe og layo tungod sa iyang trabaho.
Nailhan ang nasampit nga si Char Grey diin mipalit og usa ka ‘life-sized doll’ kun munyeka nga sama kadako sa usa ka tawo, diin halos kaparehas niini og nawong. Kini ang iyang gihimo isip espesyal nga regalo alang sa iyang bana nga si Callum.
Sumala ni Char Grey, nakabantay siya nga usahay maglisod ang ilang relasyon ilabi na kung kinahanglan siya mobiyahe og layo tungod sa iyang trabaho.
Tungod niini, nakahunahuna siya og paagi aron dili mobati og kamingaw ang iyang bana. Iyang gipili ang pagpalit sa maong munyeka aron adunay magakos si Callum samtang wala siya, ug aron mapadayon ang ilang ‘closeness’ bisan pa sa kalayo.
Epektibo usab kini nga ideya, tungod kay sumala sa magtiayon, mas nalampos ug mas naglig-on pa ang ilang relasyon human niini nga solusyon.
