Gideklara sa Korte Suprema nga unconstitutional o supak sa Konstitusyon ang mga Articles of Impeachment batok kang Vice President Sara Duterte.
Matod ni Atty. Camille Ting, ang tigpamaba sa Korte Suprema sa press briefing, ang Supreme Court mibotar nga supak sa balaod ang impeachment complaint batok kang VP Sara, tungod kay kini nakalapas sa ‘one-year rule’ ug wala misunod sa due process o patas nga pamaagi sa tanang hugna sa impeachment process.
Ang maong desisyon misubay sa ‘consolidated petition’ nga gisang-at ni VP Duterte, uban sa abogado nga si Atty. Israelito Torreon ug uban pang petitioners, nga nanawagan sa Korte nga ideklara nga ‘null and void’ ang impeachment complaints batok sa Bise Presidente.
Kahinumdoman nga niadtong Disyembre 2024, tulo ka impeachment complaints ang gisang-at batok kang VP Sara nga may kalabotan sa giingong pag-abuso sa confidential funds sa iyang opisina ug sa Department of Education, diin siya usab nagsilbing kalihim.
Apan ang ikaupat nga reklamo, nga gisuportahan sa 1/3 sa mga miyembro sa House of Representatives, maoy gitugot ug gi-transmit ngadto sa Senado, isip opisyal nga impeachment case.
Ang one-year rule gilatid sa 1987 Constitution aron malikayan ang ‘repeated harassment’ o pamolitikang pag-abuso. Dugang pa, giingon sa korte nga dili lang kay ang Senado o Kongreso ang modumala sa proseso, apan ang due process o patas nga pagdungog ang kinahanglan ipatuman sa tanang hugna, gikan sa pag-file hangtod sa transmission.
Sa pamahayag sa kampo ni Vice President Sara Duterte, ilang giila nga ang desisyon sa Korte Suprema kalampusan sa rule of law ug sa depensa sa mandato sa katawhan nga nagbutar kaniya.
Samtang ang House of Representatives wala pa mopagawas og opisyal nga pahayag bahin sa desisyon sa Korte Suprema.
