Gipahimutang sa laing petsa ang arraignment batok kang Senador Jinggoy Estrada ug kanhi Department of Public Works and Highways (DPWH) Secretary Manuel Bonoan sa kasong graft ug plunder sa Sandiganbayan Fifth Division.
Dapat unta matigayon ang arraignment sa duha karong Martes, Hunyo 30, apan gibalhin kini ngadto sa Hulyo 28.
Kini human mosaka ang mosyon sa state prosecutors sa anti-graft court aron usbon ang case information ug tangtangon si Bonoan isip akusado sa maong kaso.
Gikumpirma usab ni Ombudsman Jesus Crispin Remulla niadtong Lunes nga miuyon si Bonoan nga mahimong state witness. Matod sa Ombudsman, importante ang kahibalo sa kanhi kalihim aron makatabang sa pagpalig-on sa mga kaso may kalabotan sa flood control scandal.
Ang arraignment mao ang pormal nga pagsugod sa proseso sa pagtaral diin kinahanglan moatubang ang mga akusado sa korte aron ipahayag kung guilty ba o not guilty sila sa mga kasong giatubang.
