GENERAL SANTOS CITY – Anaa na sa luwas nga kahimtang ang ulahing biktima sa pagpamusil nga natigayon dinhi sa dakbayan, kagahapong adlawa.
Base sa report sa San Isidro Police Station, natigayon ang insidente pasado alas-4:00 sa hapon, sa Conel Road, tapad sa Le Sandra Subdivision, Brgy San Isidro ning dakbayan.
Giila ang biktima nga si Silvano Bombales, 41-anyos, usa ka Arnis instructor, residente sa Liloha, Brgy Lagao ning siyudad.
Base sa pahayag sa gwardiya sa nahisgutang subdibisyon nga nakakita matud pa sa insidente, sakay ang biktima sa iyang motorsiklo ug ginasubay ang Conel Road paingon sa NLSA Road.
Gisundan matud pa kini sa usa ka pula nga TMX nga motorsiklo nga may sakay nga duha ka lalaki, dayon gipusil sa makadaghan nga higayon sa gunman nga mao ang back-rider.
Paspas matud pang misibat paingon sa wala matinong direksyon ang mga suspek. Samtang ang biktima ang gilayong gidala sa usa ka pribadong ospital ning dakbayan.
Nakaangkon matud pa kini ug duha ka samad pinusilan sa ilawom sa wala nga dalunggan, usa sa dughan, ug duha sa likod, ug kasamtangang nagpaalim sa nahisgutang tambalanan.
Narekober sa kapulisan sa crime scene ang walo ka basyo sa caliber 9mm, nga gikatakda nang ipailawom sa ballistic examination.
Sa inisyal nga imbestigasyon, personal nga bangi ang usa sa gitutukang anggulo sa nasampit nga pagpamusil, apan nagpadayon pa ang pag-imbestiga sa kapulisan.
