GENERAL SANTOS CITY – Kasong pagsupak sa Section 11 sa RA 9165 ug RA 10591 o Comprehensive Law on Firearms and Ammunition ang giatubang sa barangay kagawad nga nasikop atul sa gipatuman nga search operation sa Sapu Masla sa Malapatan, Sarangani, kagahapon sa kaadlawon.
Kini human marekober sa posisyon ni Kag. Al Sambaga Alyas Bong Sambaga, 54 anyos, residente sa nasampit nga lugar, ang lima ka sachet sa shabu nga nagkantidad ug P7,500, ug usa ka caliber 45 pistol ug 11 ka rounds sa bala niini.
Gipatuman ang naasoy’ng operasyon base sa search warrant nga pirmado ni ni Hon. Judge Oscar Noel Jr. sa Justice on Wheels, sa kasong paglapas sa RA 9165.
Matud kang Kat Abad, tigpamaba sa PDEA-12, anaa sa targetlist sa PNP ug PDEA si Sambaga ug gikonsiderang high-value target isip usa ka elected official, hinungdan nga gibalhug nila kini sa ilang regional detention facility.
Samtang sa laing barangay partikular sa Lun Padidu sa Malapatan gihapon, nasikop ang laing usa ka drug personality nga giilang si ROBINSON MONG, 36 anyos, minyo ug walay trabaho, residente sa nasampit nga lugar.
Base usab kini sa search warrang nga gipatuman, kung asa nakumpiska sa iyang posisyon ang tulo ka sachet sa shabu nga nagkantidad ug P3,750.
Kasong pagsupak sa Section 11 sa RA 9165 ang gikatakdang ipasang-at batok sa suspek nga kasamtangan nang balhug sa selda.
