Miabot na sa kapin 4 ka milyon ka indibidwal, o bugti sa kapin 1.2 milyon ka pamilya, ang naapektuhan sa hiniusang epekto sa mga bagyong Luis ug Maymay ug habagat.
Sumala sa pinakabag-ong datos gikan sa Office of Civil Defense (OCD), natala ang mga apektadong populasyon sa mosunod nga mga rehiyon: Ilocos Region, Cagayan Valley, Central Luzon, Bicol, Western Visayas, Zamboanga Peninsula, Calabarzon, Cordillera Administrative Region, Metro Manila ug Mimaropa.
Sa mga apektadong pamilya, kapin 51,000 ka indibidwal ang temporaryong nagpuyo sa mga evacuation center.
Base sa datos sa OCD, 21 na ka kinabuhi ang gikamatay sa mga kalamidad. Pinakataas ang ihap sa mga namatay sa Benguet nga mikabat sa 15 ka tawo, samtang adunay uban pang casualties sa La Trinidad, Baguio ug Atok, nga kadaghanan namatay tungod sa landslide.
Tulo usab ang namatay sa matag usa sa Rizal ug Batangas tungod sa pagkalumos, pagkakuryente ug pagdahili sa yuta.
Padayon usab ang pagpangita sa tulo ka mga tawo nga gikatahong missing gikan sa Alaminos City sa Pangasinan, Batangas City ug Candelaria sa Quezon.
Misaka na usab sa kapin P2.6 bilyon ang kantidad sa kadaot sa sektor sa imprastruktura, samtang kapin P347 milyon na ang danyos sa agrikultura.
Samtang, padayon ang paghatod sa tabang sa gobyerno ngadto sa mga naapektuhan sa kalamidad, nga mikabat na sa kapin P495 milyon.
