Giaprobahan sa Senado sa ikatulo ug katapusang pagbasa ang laing balaodnon nga magpalig-on sa pagdili sa gobyerno sa tanang Philippine Offshore Gaming Operators (POGOs).
Ang Senate Bill 2868, o ang Anti-POGO Act of 2025, kung maaprobahan, mag-repeal sa Republic Act 11590, nga naghatag og dalan alang sa offshore gaming sa nasud.
Ang maong balaudnon gimugna nila ni Sen. Bong Go, Raffy Tulfo, Pia Cayetano, Grace Poe, Risa Hontiveros ug Win Gatchalian.
Ubos sa maong balaudnon, ang mga makalapas niini mag-atubang og pagkapriso nga unom ngadto sa 12 ka tuig ug multa nga P300,000.
Nalatid usab sa maong balaudnon nga kung ang makalapas usa ka public official o empleyado, pahamtangan sila sa maximum penalty.
Niadtong 2024, nadiskubrehan sa mga awtoridad ang daghang POGO hubs nga nalambigit sa human trafficking, lakip ang nakit-an sa Bamban, Tarlac ug Porac, Pampanga.
Miresulta kini sa pagkasikop sa gipalagpot nga mayor sa Bamban, Tarlac nga si Alice Guo, nailhan usab nga Guo Hua Ping, tungod sa giingong pagkalambigit niini sa ilegal nga kalihokan sa POGO sa iyang lungsod.
