Giklaro sa kanhi aktres nga si Andi Eigenmann nga wala gyud siya gilimbongan sa iyang nobyo ug surfer nga nakabase sa Siargao nga si Philmar Alipayo.
Giklaro ni Andi nunot sa sunodsunod nga daw misteryosong IG stories niya nga nagpalutaw sa espekulasyon sa ilang buwag.
Sa IG story nga gi-share ni Andi karong Sabado, Pebrero 8, nihatag siya og mas klarong konteksto sa iyang nangaging mga post ug niingon nga gituyo kini sa usa ka partikular nga higalang babaye nga nagluib kaniya nga wala niya nganli.
Matud pa niya nga matag mag-uban ang iyang pamanhonon ug ang nahisgutang babaye, kauban usab niya kini.
Gipasabot usab ni Andi ang iyang pag-post sa maong isyu tungod kay giingong fan siya sa maong tawo nga matod niya nag-awhag sa iyang pamanhonon nga makigbuwag kaniya matag mag-away sila bisan og mosulti sab siya sa iyang side of the story.
Gihisgotan usab ni Andi sa iyang IG story ang pagpa-tattoo sa usa ka babaye nga parehas og marka sa tattoo sa iyang pamanhonon nga “224” nga wala man lang gihuna-huna ang iyang bation.
Gisuwayan usab sa kanhi aktres nga makig-abot kaniya aron mopasabot sa iyang habig apan giingong gi-snub lang siya. Matod pa ni Andi nga iyang gi-share ang maong mga post aron mahatagan og awareness ang uban nga dili normal ang iyang sitwasyon.
Ang pamanhonon ni Andi nga si Philmar mihimo usab og pamahayag sa iyang IG story ug gikumpirmar ang gipaambit sa iyang pamanhonon.
Gitubag usab ni Philmar ang mga pagsaway sa mga netizen nga mitawag kaniya nga mangingilad ug mangil-ad apan nagpasalamat sa mga tawo nga tinuod nga nakaila kaniya.
Kahinumduman nga si Andi ug Philmar magpakasal niadtong Disyembre 2020 ug kasamtangang adunay 2 ka anak nga sila si Lilo ug Koa, samtang si Andi adunay anak sa iyang kanhi karelasyon nga si Ellie.
