GENERAL SANTOS CITY- Nagpadayon karon ang imbestigasyon sa mga otoridad kalabot sa pagpamusil-patay sa anak sa Moro Islamic Liberation Front o MILF Commander sa Lambayong, Sultan Kudarat.
Matud kang PSI Herman Luna, hepe sa Lambayong Municipal Police Station, gibanhigan matud pa sa riding in tandem suspects si Norman Sanday alyas Dong, anak ni MILF 106 Base Command Commander Guevarra samtang sakay sa motorsiklo niini sa Prk San Isidro, Brgy New Cebu sa nasampit nga lugar.
Migawas sa inisyal nga imbestigasyon sa mga otoridad nga personal grudge ang posibleng motibo sa pagpatay sa biktima.
Narekober usab sa crime scene ang 3 ka bala sa caliber 45 pistol nga armas nga maoy gigamit sa pagpamusil.
Gideklarang dead on the spot ang biktima gumikan sa naangkon nga samad-pinusilan sa ulo ug lawas.
Sa karon gisaad ni Commander Guevarra nga gitugyan na niya sa PNP ang imbestigasyon sa pagpatay sa iyang anak.
