GENSAN- Misibat na ug wala na makita pa sa usa ka lugar sa South Cotabato ang bana kuyog sa iyang asawa human gipabuntisan sa bana ang kinse anyos nila nga katabang.
Kini human nabisto miaging adlaw nga nagsabak na ug tulo ka bulan ang kinse anyos nga biktima.
Gani nasayran nga midangop na sa womens and childrens desk sa kapulisan ang kinse anyos ug ang ginikanan niini ug nakapasakla ug kaso nga lugos batuk sa suspek nga si Rambo Saarenas nga taga Polomolok South Cotabato.
Nahitabo matud pa kini kaniadtong unang semana sa Nobyembre dihang nakainum ang amo nga suspek dihang gikalitan ug bira ang kinse anyos ug gidala sa mangitngit nga bahin sa panimalay sa suspek ug didto nahitabo ang pag-among-among.
Nasundan pa ang pag-among-among dihang gisugo sa babaye nga amo ang biktima ug gipauban sa suspek pagsakay sa motor apan gidala hinuon kini sa usa ka lodging house ug subli kining giabuso ug gibaharan nga dili mutug-an kay may mahitabo sa iyang pamilya.
Gawas sa kinse anyos nasayran nga adunay laing biktima nga gi-among-amongan ang suspek nga usa ka katorse anyos nga silingan lamang sa kinse anyos.
Gipaabut na lamang nga mugawas ang Warrant of Arrest sa suspek nga milayas na sa ilang lugar.
