Tungod gitugotan ang Anti-Money Laundering Council o AMLC nga magpaambit og impormasyon ngadto sa mga foreign financial intelligence unit, mas posible usab kini nga makahatag og mga rekord ngadto sa Senate impeachment court, sumala ni prosecution legal spokesperson ug counsel Benjamin “Jay” Tolosa Jr.
Matud ni Tolosa, gitugotan sa mga patakaran sa AMLC ang pagbayloay og impormasyon sa mga ‘foreign counterpart’ ug uban pang awtoridad ubos sa pipila ka kondisyon.
Sumala kaniya, kung mahimo kini sa mga langyaw nga institusyon, mas mahimo usab nga ipaambit ang mga dokumento ngadto sa impeachment court nga usa ka constitutional institution.
Giinsistir ni Tolosa nga walay ‘absolute prohibition’ sa kasamtangang mga balaod nga makapugong sa impeachment court sa pag-isyu og subpoena aron ipresentar ang mga rekord sa AMLC.
Niadtong Hulyo, gitugotan sa Senate impeachment court ang subpoena alang sa AMLC ug bank records nila Vice President Sara Duterte ug iyang bana nga si Manases Carpio, human makita sa korte nga ‘prima facie relevant’ ug material ang mga dokumento sa mga alegasyon ubos sa Article II.
Sumala usab sa korte, ang Section 8-A sa Anti-Money Laundering Act nagdili sa unauthorized disclosure sa mga personnel sa AMLC, apan wala niini tangtanga ang subpoena power sa Senado isip impeachment court.
Bisan pa niini, matud ni Tolosa, mahimo gihapon nga supakon sa depensa ang mga rekord kung motestigo na si AMLC Executive Director Ronel Buenaventura ug kung pormal nang ipresentar sa prosekusyon ang mga dokumento isip ebidensya.
Gilauman nga motestigo si Buenaventura sa witness stand sa Lunes human hatagan sa impeachment court og dugang nga panahon ang depensa aron masusi ang mga rekord sa AMLC ug maandam ang ilang mga pangutana.
