Mitabang ang gobyerno sa Amerika ug P84 million o $1.5 million nga humanitarian assistance alang sa mga biktima sa bagyong Kristine.
Matud sa US Embassy nga nakabase sa Maynila, ang naasoy nga pondo isip augmentation sa nagpadayon nga paningkamot sa US Agency for International Development (USAID) aron mahatag ang mga lifesaving assistance alang sa mga naapektuhan sa bagyo sa Bicol ug sa Batangas .
Gibutyag usab sa embahada nga pinaagi sa naasoy nga pondo, makahatag ang USAID ug mga kinahanglanon nga serbisyo sama sa limpyo nga tubig mainum, sanitation, emergency shelter ug tabang pinansiyal.
Mutabang usab ang ahensiya sa paghatag ug logistic support sa pagdumala sa mga evacuation center.
Samtang una nga mitabang ang USAID kaniadtong Oktubre 27 sa Office of the Civil Defense pinaagi sa shelter-grade tarpaulins ug household relief kits sa Bicol nga gihatud sa C-130 nga gihatag sa gobyerno sa Singapore.
Naka-preposisyon usab ang disaster relief items sa OCD humanitarian relief depot sa Fort Magsaysay, usa ka EDCA site sa Nueva Ecija.
