GENERAL SANTOS CITY – Kumpirmado nga nakarehistro sa founder sa KAPA kon Kabus Padatuon ang ambulansiya nga naharang sa kapulisan sa Iligan og nakuhaan og mga armas og eksplosibo.
Kini sukwahi sa unang migawas nga report nga matud pa gipanag-iyahan sa nagpangalan og Antonio Apolinario nga taga Prk 3 Buayan ning syudad ang naasoy nga ambulansiya.
Apan sa pagsusi sa Bombo Radyo base sa nakalap nga mga dokumento, nasuta nga nakarehistro ang sakyanan kang Joel Apolinario, ang founder sa KAPA nga base sa SEC advisory usa ka investment scheme.
Ingon man sa insurance sa ambulansiya ang nakapangalan gihapon kang Joel Apolinario. Dihang pagtuki-tuki usab sa Bombo Radyo, nasayran nga dili sa nagpangalan og Antonio Apolinario ang balay nga anaa sa Prk 3 Buayan subay sa unang migawas nga report.
Sa pahayag sa mga residente sa lugar og mismong ang mga silingan sa palibot nga ang gitudlong balay ang panag-iya ni Joel Apolinario o dili sa nagpangalan og antonio Apolinario nga wala nila mailhan og wala magpuyo sa maong balay.
Una niini, sa pakighinabi sa Bombo Radyo, gibutyag ni PSI James Dalleon, Chief of police sa Iligan City Police Office – Station 4 nga nakasuhan na silang Andy pastoral, Gilbert Pasiculan ug Eleizer Tormon sa kasong paglapas sa illegal possession of firearms, ammunitions and explosives.
Kini human nga narekober sa gisakyan nilang ambulansiya nga ilang naintercept ang granada, M16 rifle, mga bala og uban pang matang sa mga pistola.
Nameke pa og ID ang mga nahisgutan human nga nagpaila nga mga sundalo.
Dihang gipangitaan ug ID, ilang gitunol sa kapulisan ang ID sa army reserve command ilawom sa 304 Brigade apan nasuta nga sila pulos mga sibilyan.
